ໃນວັນທີ 30 ກໍລະກົດ 2026  ພະແນກເຕັກໂນໂລຊີ ແລະ ການສື່ສານແຂວງ ໄດ້ຈັດກອງປະຊຸມສະຫຼຸບວຽກງານປະຈຳເດືອນກໍລະກົດ ແລະ ວາງທິດທາງແຜນການປະຈຳເດືອນສິງຫາ ປີ 2026 ຢ່າງເປັນທາງການ. ກອງປະຊຸມດັ່ງກ່າວ ໂດຍການໃຫ້ກຽດ ເຂົ້າຮ່ວມເປັນປະທານ ຂອງທ່ານ ສອນສະຫວັນ ຈັນທະວົງ, ຫົວໜ້າພະແນກເຕັກໂນໂລຊີ ແລະ ການສື່ສານແຂວງ; ມີຮອງຫົວໜ້າພະແນກ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ຕີລາຄາຄືນເຖິງຜົນງານການຈັດຕັ້ງປະຕິບັດວຽກງານໃນໄລຍະ 01 ເດືອນຜ່ານມາ ເຊິ່ງບັນດາຂະແໜງການສາມາດຍາດໄດ້ຜົນງານອັນພົ້ນເດັ່ນໃນຫຼາຍດ້ານ, ພ້ອມທັງໄດ້ຍົກໃຫ້ເຫັນບາງຂໍ້ຄົງຄ້າງທີ່ຕ້ອງໄດ້ສຸມໃສ່ແກ້ໄຂ. ບົນຈິດໃຈສ້າງສັນ, ຜູ້ເຂົ້າຮ່ວມກອງປະຊຸມ ໄດ້ພ້ອມກັນປຶກສາຫາລື ແລະ ເປັນເອກະພາບຕໍ່ທິດທາງແຜນການຈຸດສຸມໃນເດືອນສິງຫາ 2026, ເນັ້ນໃສ່ກະກຽມເປີດກອງປະຊຸມການເຮັດທົດລອງຈັດຊຸດຝຶກອົບຮົມວຽກງານການຫັນເປັນດິຈິຕອນ ຢູ່ພາຍໃນແຂວງໄຊຍະບູລີ ເພື່ອເປັນຕົ້ນແບບ ແລະ ນຳເອົາບົດຮຽນໄປຈັດຕັ້ງຜັນຂະຫຍາຍອອກສູ່ບັນດາພະແນກການ, ອົງການອ້ອມຂ້າງແຂວງ ແລະ ບັນດາເມືອງ ຮັບປະກັນການບໍລິຫານ ແລະ ບໍລິການລັດດິຈິຕອນ ເຮັດໃຫ້ວຽກງານມີຄວາມຄ່ອງຕົວ, ທັນສະໄໝ ແລະ ຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່.

ໃນໂອກາດນີ້, ທ່ານ ສອນສະຫວັນ ຈັນທະວົງ ໄດ້ໃຫ້ກຽດໂອ້ລົມ ແລະ ຊີ້ນຳຕໍ່ກອງປະຊຸມ ໂດຍເນັ້ນໜັກໃຫ້ຄະນະນຳແຕ່ລະຂະແໜງການ ສືບຕໍ່ເອົາໃຈໃສ່ຍົກສູງຄວາມຮັບຜິດຊອບ, ຖືເອົາວຽກງານວິຊາສະເພາະເປັນຫຼັກ ແລະ ປະສານສົມທົບກັນຢ່າງແໜ້ນແຟ້ນ ເພື່ອຈັດຕັ້ງປະຕິບັດບັນດາຄາດໝາຍທີ່ວາງໄວ້ໃຫ້ປະກົດຜົນເປັນຈິງ. ພ້ອມທັງ ຮຽກຮ້ອງໃຫ້ພະນັກງານ-ລັດຖະກອນທຸກສະຫາຍ ສືບຕໍ່ຝຶກຝົນຫຼໍ່ຫຼອມຕົນເອງ, ຍົກລະດັບຄວາມຮູ້-ຄວາມສາມາດດ້ານເຕັກໂນໂລຊີດິຈິຕອນໃຫ້ສູງຂື້ນ ເພື່ອປະກອບສ່ວນຢ່າງຕັ້ງໜ້າເຂົ້າໃນພາລະກິດພັດທະນາເສດຖະກິດ-ສັງຄົມຂອງແຂວງ ໃຫ້ມີການຫັນປ່ຽນຢ່າງແຂງແຮງ.

ບົດຂ່າວໂດຍ: ຂະແໜງບໍລິຫານລັດດິຈິຕອນ ແລະ ຄວາມປອດໄພໄຊເບີ