ຕອນບ່າຍ ວັນທີ 16 ກໍລະກົດ 2026 ພະແນກເຕັກໂນໂລຊີ ແລະ ການສື່ສານ ແຂວງໄຊຍະບູລີ ໄດ້ຈັດກອງປະຊຸມເຜີຍແຜ່ຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມເນື້ອໃນຫຼັກສູດ ການຝຶກອົບຮົມວຽກງານການຫັນເປັນດິຈິຕອນຂຶ້ນ ທີ່ຫ້ອງປະຊຸມຂອງພະແນກ, ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ສອນສະຫວັນ ຈັນທະວົງ ຫົວໜ້າພະແນກເຕັກໂນໂລຊີ ແລະ ການສື່ສານ ແຂວງ, ມີບັນດາຮອງຫົວໜ້າພະແນກ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານ-ລັດຖະກອນພາຍໃນພະແນກ ເຂົ້າຮ່ວມຢ່າງພ້ອມພຽງ.

       ກອງປະຊຸມໃນຄັ້ງນີ້, ໄດ້ຮັບຟັງການຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມເນື້ອໃນຫຼັກສູດ, ບັນດາຫົວຂໍ້ເນື້ອໃນຫຼັກສູດການຝຶກອົບຮົມກ່ຽວກັບວຽກງານການຫັນເປັນດິຈິຕອນ ແລະ ແຜນການດໍາເນີນງານການຈັດກອງປະຊຸມສໍາມະນາຮັບຮອງຫຼັກສູດ ທີ່ຈະຈັດຂື້ນໃນຕົ້ນເດືອນ ສິງຫາ 2026 ນີ້, ເພື່ອໃຫ້ຜູ້ເຂົ້າຮ່ວມໄດ້ຮັບຊາບ ແລະ ມີຄວາມເຂົ້າໃຈເປັນເອກະພາບກັນ. ພ້ອມດຽວກັນນັ້ນ, ຜູ້ເຂົ້າຮ່ວມກອງປະຊຸມຍັງໄດ້ມີການປະກອບຄຳຄິດຄຳເຫັນ ແລະ ປຶກສາຫາລືຢ່າງກົງໄປກົງມາ ເພື່ອເຮັດໃຫ້ການກະກຽມເນື້ອໃນຫຼັກສູດດັ່ງກ່າວມີຄວາມຄົບຖ້ວນ, ສົມບູນ ແລະ ສາມາດນຳໄປປະຕິບັດໄດ້ ຢ່າງມີປະສິດທິຜົນສູງ ໃນການຂັບເຂື່ອນວຽກງານການຫັນເປັນດິຈິຕອນ ຢູ່ພາຍໃນແຂວງໄຊຍະບູລີ.

        ໃນຕອນທ້າຍຂອງກອງປະຊຸມ, ທ່ານ ສອນສະຫວັນ ຈັນທະວົງ ໄດ້ມີຄຳເຫັນຊີ້ນຳຕໍ່ຄະນະຮັບຜິດຊອບທີມງານຄູຝຶກ ແລະ ພະນັກງານທຸກທ່ານ ໂດຍໄດ້ເນັ້ນໜັກເຖິງຄວາມສຳຄັນຂອງວຽກງານການຫັນເປັນດິຈິຕອນ ເຊິ່ງເປັນວຽກງານບຸລິມະສິດ ໃນໄລຍະໃໝ່. ທ່ານໄດ້ຮຽກຮ້ອງໃຫ້ຄະນະຮັບຜິດຊອບ ເອົາໃຈໃສ່ຄົ້ນຄວ້າ ແລະ ກະກຽມເນື້ອໃນຫຼັກສູດໃຫ້ມີເນື້ອໃນຄົບຖ້ວນ, ມີຄວາມທັນສະໄໝ, ຕິດພັນກັບສະພາບຄວາມເປັນຈິງ ແລະ ສາມາດຍົກລະດັບຄວາມຮູ້, ຄວາມສາມາດດ້ານດິຈິຕອນ ໃຫ້ແກ່ບຸກຄະລາກອນ ພາຍໃນແຂວງຢ່າງແທ້ຈິງ.