ໃນວັນທີ 14 ກໍລະກົດ 2026, ທີ່ຫ້ອງປະຊຸມ ພະແນກເຕັກໂນໂລຊີ ແລະ ການສື່ສານ ແຂວງໄຊຍະບູລີ, ໄດ້ຈັດກອງປະຊຸມປຶກສາຫາລືຮ່ວມລະຫວ່າງ ຫ້ອງການກອງເລຂາກອງທຶນພັດທະນາໂທລະຄົມ ແລະ ການຫັນເປັນດິຈິຕອນ ກັບ ພະແນກເຕັກໂນໂລຊີ ແລະ ການສື່ສານ ແຂວງໄຊຍະບູລີ, ໃຫ້ກຽດເຂົ້າຮ່ວມເປັນປະທານກອງປະຊຸມໂດຍ ທ່ານ ນາງ ດວງໄພວອນ ສີບຸບຜາ, ຮອງຫົວໜ້າພະແນກ ເປັນປະທານ, ມີພະນັກງານ-ລັດຖະກອນ ຈາກ ຂະແໜງປະໄປສະນີ ແລະ ການສື່ສານ ແລະ ຂະແໜງບໍລິຫານລັດດິຈິຕອນ ແລະ ຄວາມປອດໄພໄຊເບີ ຂອງພະແນກ ເຂົ້າຮ່ວມຢ່າງພ້ອມພຽງ.

ໃນກອງປະຊຸມຄັ້ງນີ້ ໄດ້ມີການປຶກສາຫາລື ແລະ ແລກປ່ຽນຄວາມຄິດເຫັນກ່ຽວກັບ ການຄຸ້ມຄອງ, ການອອກອະນຸຍາດໃຫ້ບັນດາຫົວໜ່ວຍທຸລະກິດໂທລະຄົມມະນາຄົມ ແລະ ອິນເຕີເນັດ, ຫົວໜ່ວຍທຸລະກິດໄປສະນີ ແລະ ຫົວໜ່ວຍທຸລະກິດດິຈິຕອນ ຢູ່ພາຍໃນແຂວງ; ກົນໄກການປະສານງານລະຫວ່າງຂັ້ນກະຊວງ ຫາແຂວງ, ຂັ້ນແຂວງຫາບັນດາເມືອງ, ສຸມໃສ່ການເກັບລາຍຮັບ ຄ່າທໍານຽມ-ຄ່າບໍລິການ ໃຫ້ຖືກຕ້ອງຕາມລະບຽບ ກົດໝາຍ ແລະ ບັນລຸຕາມແຜນການ, ພ້ອມທັງສະຫຼຸບຂໍ້ມູນສະຖິຕິ ລາຍງານໃຫ້ກະຊວງຢ່າງເປັນປົກກະຕິ.

ກອງປະຊຸມດຳເນີນໄປດ້ວຍບັນຍາກາດທີ່ເປັນກັນເອງ ແລະ ສ້າງສັນ, ໂດຍທຸກຝ່າຍໄດ້ຮ່ວມສະເໜີຄວາມຄິດເຫັນ ແລະ ກຳນົດແນວທາງການປະສານງານໃນໄລຍະຕໍ່ໄປ ເພື່ອຍົກລະດັບວຽກງານດ້ານເຕັກໂນໂລຊີ, ການສື່ສານ ແລະ ການຫັນເປັນດິຈິຕອນ ໃຫ້ສອດຄ່ອງກັບນະໂຍບາຍຂອງພັກ ແລະ ລັດ.