ໃນຕອນເຊົ້າຂອງວັນທີ 16 ມິຖຸນາ 2026 ນີ້ ພະແນກ ເຕັກໂນໂລຊີ ແລະ ການສື່ສານ ແຂວງໄຊຍະບູລີ ໄດ້ຈັດກອງປະຊຸມປຶກສາຫາລື ກ່ຽວກັບວຽກງານການຂື້ນທະບຽນໝາຍເລກໂທລະສັບ ພາຍໃຕ້ການເປັນປະທານຂອງ ທ່ານ ນາງ ດວງໄພວອນ ສີບຸບຜາ ຮອງຫົວໜ້າພະແນກ, ມີບັນດາບໍລິສັດໂທລະຄົມມະນາຄົມ ເຂົ້າຮ່ວມ.

          ໃນກອງປະຊຸມ ໄດ້ຮັບຟັງການຜ່ານຂໍ້ຕົກລົງ ຂອງກະຊວງເຕັກໂນໂລຊີ ແລະ ການສື່ສານ ສະບັບເລກທີ 978/ກຕສ ວ່າດ້ວຍການຂື້ນທະບຽນໝາຍເລກໂທລະສັບ ແລະ ແຈ້ງການ ຂອງຫ້ອງການກະຊວງ ຕສ ສະບັບເລກທີ 717/ຫກ.ອດທ ການເປີດນໍາໃຊ້ລະບົບຂື້ນທະບຽນເລກໝາຍໂທລະສັບ Version 2.0 ແລະ ລາຍງານສະຫຼຸບຜົນຂອງການລົງຈັດຕັ້ງປະຕິບັດວຽກງານການຂື້ນທະບຽນເລກໝາຍໂທລະສັບ ໃນໄລຍະຜ່ານມາ ແລະ ຮ່ວມກັນຄົ້ນຄວ້າ ປືກສາຫາລື ແລະ ແລກປ່ຽນວິທີການຈັດຕັ້ງປະຕິບັດໃນຕໍ່ໜ້າ ເພື່ອໃຫ້ການຂື້ນທະບຽນມີຜົນສໍາເລັດ; ເຊີ່ງຈຸດປະສົງ ແມ່ນເຮັດໃຫ້ຜູ້ເຂົ້າຮ່ວມກອງປະຊຸມກຳແໜ້ນດ້ານຫຼັກການ, ລະບຽບການ, ມາດຕະການ ແລະ ວິທີການ ກ່ຽວກັບການຂຶ້ນທະບຽນເລກໝາຍໂທລະສັບ ຂອງຜູ້ໃຫ້ ແລະ ຜູ້ໃຊ້ ບໍລິການໂທລະຄົມມະນາຄົມ ແລະ ອິນເຕີເນັດ ເພື່ອເກັບກໍາຂໍ້ມູນ ຂອງຜູ້ໃຊ້ເລກໝາຍໂທລະສັບ. ກ່ອນການເປີດນໍາໃຊ້ບໍລິການໂທລະຄົມມະນາຄົມ ແລະ ອິນເຕີເນັດ ເຂົ້າໃນລະບົບຖານຂໍ້ມູນ ໃຫ້ມີຄວາມຖືກຕ້ອງ, ຄົບຖ້ວນ ແລະ ຊັດເຈນ. ແນ່ໃສ່ໃຫ້ເປັນຂໍ້ມູນພື້ນຖານໃນການສ້າງເລກລະຫັດດິຈິຕອນ ຮອງຮັບການນໍາໃຊ້ເລກໝາຍໂທລະສັບ ເຂົ້າໃນລະບົບເຕັກໂນໂລຊີດິຈິຕອນ, ຮັບປະກັນໄດ້ວຽກງານປ້ອງກັນຊາດ-ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຄວາມປອດໄພຂອງສັງຄົມ.

ໂດຍ: ນາງ ສຸນິດາ ສົມສີ