ເນື່ອງໃນໂອກາດວັນກໍາມະກອນສາກົນ ຄົບຮອບ 140 ປີ (1 ພຶດສະພາ 1886 – 1 ພຶດສະພາ 2026) ສະຫະພັນກຳມະບານພະແນກເຕັກໂນໂລຊີ ແລະ ການສື່ສານ ແຂວງໄຊຍະບູລີ ຈັດພິທີປາຖະກະຖາຂຶ້ນ ໃນຕອນບ່າຍຂອງວັນທີ 06 ພຶດສະພາ 2026 ນີ້ ທີ່ຫໍປະຊຸມ ພະແນກເຕັກໂນໂລຊີ ແລະ ການສື່ສານ ໂດຍໃຫ້ກຽດເຂົ້າຮ່ວມເປັນປະທານ ແລະ ປາຖະກະຖາຂອງສະຫາຍ ສອນສະຫວັນ ຈັນທະວົງ ເລຂາຄະນະພັກຮາກຖານ, ມີບັນດາສະຫາຍຄະນະບໍລິຫານງານສະຫະພັນກໍາມະບານ ພະແນກເຕັກໂນໂລຊີ ແລະ ການສື່ສານ ພ້ອມດ້ວຍສະມາຊິກກໍາມະບານ ສະຫະພັນເຂົ້າຮ່ວມຮັບຟັງ.

ໃນພິທີອັນມີຄວາມໝາຍ ຄວາມສໍາຄັນນີ້ ສະຫາຍ ສອນສະຫວັນ ຈັນທະວົງ ເລຂາຄະນະພັກຮາກຖານ, ໄດ້ໃຫ້ກຽດຂຶ້ນປາຖະກະຖາຫວນຄືນມູນເຊື້ອປະຫວັດຄວາມເປັນມາຂອງ ວັນກໍາມະກອນສາກົນ ວັນທີ 01 ພຶດສະພາ, ໂດຍໄດ້ຍົກໃຫ້ເຫັນ ສະພາບແວດລ້ອມທີ່ພາໃຫ້ກໍາເນີດວັນກໍາມະກອນສາກົນບັນດາອົງການຈັດຕັ້ງ ສົນທິສັນຍາ ຖະແຫຼງການ ແລະ ກອງປະຊຸມຕ່າງໆກ່ຽວກັບກໍາມະກອນ ແລະ ຜູ້ອອກແຮງງານໃນພາກພື້ນ ແລະ ສາກົນ ການປະກອບສ່ວນໃນພາລະກິດ ປະຕິວັດຂອງກໍາມະກອນລາວແຕ່ລະໄລຍະ. ເຊິ່ງໃນຕະຫຼອດໄລຍະ 140 ປີ ພາຍໃຕ້ການນໍາພາຂອງບັນພະບູລຸດ ຜູ້ອົງອາດກ້າຫານໃນແຕ່ລະຍຸກແຕ່ລະສະໄໝ. ກໍ່ຄືພາຍໃຕ້ ການນໍາພາຂອງພັກປະຊາຊົນປະຕິວັດລາວ ໃນປະຈຸບັນຊົນຊັ້ນກໍາມະກອນລາວ ກໍ່ໄດ້ປະກອບສ່ວນ ແລະ ສະໜັບສະໜູນໃນຂະບວນການຕໍ່ສູ້ຂອງກໍາມະກອນສາກົນ ເພື່ອທວງສິດ ແລະ ຜົນປະໂຫຍດອັນຊອບທໍາໃນການອອກແຮງງານຂອງກໍາມະກອນ. ມາຮອດປະຈຸບັນ ກໍາມະກອນລາວໄດ້ມີຕົວແທນໃນການປົກປ້ອງສິດ ແລະ ຜົນປະໂຫຍດ ອັນຊອບທໍາຂອງຕົນນັ້ນກໍ່ຄືອົງການກໍາມະບານລາວ ກໍ່ໄດ້ກໍານົດວຽກງານມະຫາຊົນຂອງພັກໃນໄລຍະໃໝ່ ຢ່າງຈະແຈ້ງ ວ່າສະຫະພັນກໍາມະບານ ຕ້ອງຍົກສູງຄວາມສາມາດ ໃນການຈັດຕັ້ງນໍາພາ ແລະ ການເປັນແບບຢ່າງຂອງກໍາມະບານແຕ່ລະຂັ້ນ ຂະຫຍາຍການຈັດຕັ້ງ ກໍາມະບານຢູ່ຕາມຮາກຖານ ເພື່ອເພິ່ມກໍາລັງແຮງຂອງອົງການຈັດຕັ້ງກໍາມະບານໃຫ້ຮັບປະກັນທາງດ້ານປະລິມານ ແລະ ຄຸນນະພາບ ສາມາດເປັນຕົວແທນໃນການປົກປ້ອງສິດຜົນປະໂຫຍດອັນຊອບທໍາຂອງສະມາຊິກກໍາມະບານ ກໍາມະກອນ ແລະ ຜູ້ອອກແຮງງານໃຫ້ໄປສູ່ຄຸນນະພາບໃໝ່ ຮັບປະກັນຄວາມສະເໝີພາບ ແລະ ຄວາມຍຸຕິທໍາ ໃນການຊົມໃຊ້ໝາກຜົນຂອງການອອກແຮງງານ. ດັ່ງນັ້ນ ພາລະກໍາປະຫວັດສາດຂອງຊົນຊັ້ນກໍາມະກອນໄດ້ຊີ້ໃຫ້ພວກເຮົາເຫັນຢ່າງຈະແຈ້ງວ່າ ຊົນຊັ້ນກໍາມະກອນນໍາໜ້າຂອງຍຸກສະໄໝຕິດພັນກັບພື້ນຖານການຜະລິດ ມີລະບຽບວິໄນ, ເປັນຜູ້ມີຫົວຄິດປະດິດສ້າງ ມີຄວາມສາມາດພຽງພໍໃນການສ້າງສັງຄົມໃໝ່ທີ່ກ້າວໜ້າສີວິໄລ ແລະ ຍຸຕິທໍາ ພາຍໃຕ້ການນໍາພາຂອງພັກ.

ໃນຕອນທ້າຍສະຫາຍຍັງໄດ້ໃຫ້ສະມາຊິກກຳແໜ້ນເອົາຄຸນລັກສະນະອັນດີເລີດຂອງຊົນຊັ້ນກຳມະກອນສາກົນດັ່ງ 03 ຍຶດໝັ້ນ: 1) ຍຶດໝັ້ນລັກສະນະຊົນຊັ້ນ ຂອງຊົນຊັ້ນກຳມະກອນ; 2) ຍຶດໝັ້ນລັກສະນະຕໍ່ສູ້ ຂອງຊົນຊັ້ນກຳມະກອນ; 3) ຍຶດໝັ້ນລັກສະນະມະຫາຊົນ.

ຊົນຊັ້ນກໍາມະກອນແມ່ນພື້ນຖານແຫ່ງການກໍາເນີດເກີດຂຶ້ນ, ແມ່ນການຄົງຕົວ ແລະ ຂະຫຍາຍຕົວຂອງສັງ ຄົມມະນຸດ, ທັງແມ່ນປັດໃຈພື້ນຖານ ເຊິ່ງສະແດງໃຫ້ເຫັນຄຸນລັກສະນະອັນດີເລີດຄື: 1) ຊົນຊັ້ນກຳມະກອນເປັນ​ຊົນ​ຊັ້ນ​ທີ່​ມີ​ນ້ຳ​ໃຈ​ຮັກ​ຊາດ​ຢ່າງ​ແທ້​ຈິງ ​ແລະ ມີ​ນ້ຳ​ໃຈ​ສາກົນ​ກຳມະ​ຊີບ​ອັນ​ຜ່ອງ​ໃສ; 2) ຊົນຊັ້ນກຳມະກອນເປັນ​ຊົນ​ຊັ້ນ​ທີ່​ດີ​ເລີດ ​ແລະ ກ້າວໜ້າ​ກ່ວາ​ໝູ່​; 3) ເປັນ​ຊົນ​ຊັ້ນ​ທີ່​ມີ​ມານະ​ຈິດ​ປະຕິວັດ​ອັນ​ສູງ​ສົ່ງ, ມີ​ຄວາມ​ຕື່ນ​ຕົວ​ຕໍ່ສູ້​ດ້ວຍ​ຄວາມ​ເດັດດ່ຽວ, ກ້າຫານ​ບໍ່​ຍອມ​ຈຳນົນ; 4) ມີ​ສະຕິຕໍ່ການຈັດຕັ້ງ ​ແລະ ມີ​ລະບຽບ​ວິ​ໄນ​ຢ່າງ​ເຂັ້ມ​ງວດ​ໃນ​ການ​ອອກ​ແຮງ​ງານ, ຮັກ​ອາຊີບ​ຂອງ​ຕົນ; 5) ມີ​ຄວາມ​ດຸ​ໝັ່ນ​ຂະຫຍັນ​ພຽນ, ​ປະຢັດ​ມັດທະຍັດບໍ່​ຟູມ​ເຟືອຍ, ບໍ່​ສໍ້​ໂກງ​, ບໍ່ໂລບ​ມາກ​ໂລພາ, ມີ​ແນວ​ຄິດ​ເອື້ອ​ເຟື້ອ​ເພື່ອ​ແຜ່​, ມີຄວາມສາມັກຄີປອງດອງຊ່ວຍເຫຼືອເຊິ່ງກັນ ແລະ ກັນ; 6) ມີ​ຫົວຄິດ​ປະດິດ​ສ້າງ, ພັດທະນາ​ຕົນ​ເອງ ທາງດ້ານ​ເຕັກນິກ​ວິທະຍາສາດທີ່ມີການ​ຂະຫຍາຍຕົວ ໃນແຕ່ລະໄລຍະ ແລະ ຕິດ​ພັນ​ກັບ​ການ​ປົກປັກຮັກສາ ແລະ ສ້າງສາ​ພັດທະນາ​ປະ​ເທດ​ຊາດ; 7) ເປັນ​ເຈົ້າ​ຕົນ​ເອງ, ບໍ່​ເອື່ອຍ​ອີງ​ໃສ່​ຄົນ​ອື່ນ, ກ້າຄິດ, ​ກ້າ​ເຮັດ​ ​ແລະ ກ້າ​ຮັບຜິດຊອບ.

ຂ່າວ+ພາບໂດຍ: ນາງ ສຸນິດາ ສົມສີ