ກອງປະຊຸມສະຫຼຸບການກໍ່ສ້າງໝ່ວຍພັກປອດໃສ, ເຂັ້ມແຂງ, ໝັກແໝ້ນ ໜ່ວຍພັກພະແນກເຕັກໂນໂລຊີ ແລະ ການສື່ສານ ທີ່ຂື້ນກັບຄະນະພັກຮາກຖານ ພະແນກ ເຕັກໂນໂລຊີ ແລະ ການສື່ສານ ແຂວງໄຊຍະບູລີ ປະຈໍາປີ 2025 ໄດ້ຈັດຂື້ນໃນຕອນແລງຂອງວັນທີ 29 ເມສາ 2026 ທີ່ຫ້ອງປະຊຸມຂອງພະແນກ ເຕັກໂນໂລຊິ ແລະ ການສື່ສານແຂວງ  ພາຍໃຕ້ການເປັນປະທານຂອງ ສະຫາຍ ​ຄຳ​ບູ່ ທອງວັນນາ  ຄະນະພັກຮາກຖານ, ເລຂາໜ່ວຍພັກ, ຮອງຫົວໜ້າພະແນກ ເຕັກໂນໂລຊີ ແລະ ການສື່ສານແຂວງ, ເປັນກຽດເຂົ້າຮ່ວມຂອງສະຫາຍ ສອນສະຫວັນ ຈັນທະວົງ ເລຂາຄະນະພັກຮາກຖານ, ຫົວໜ້າພະແນກເຕັກໂນໂລຊີ ແລະ ການສື່ສານແຂວງ ມີຄະນະທີມງານຂອງແຂວງ, ບັນດາສະຫາຍຄະນະໜ່ວຍພັກ, ສະມາຊິກພັກທັງໝົດເຂົ້າຮ່ວມ.

           ສະຫາຍ ​​ຄຳ​ບູ່ ທອງວັນນາຄະນະພັກຮາກຖານ, ເລຂາໜ່ວຍພັກ, ຮອງຫົວໜ້າພະແນກ ເຕັກໂນໂລຊິ ແລະ ການສື່ສານແຂວງ, ໄດ້ຂື້ນຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2025 ແລະ ທິດທາງແຜນການ ປະຈໍາປີ 2026 ໜ່ວຍພັກ ພະແນກເຕັກໂນໂລຊີ ແລະ ການສື່ສານ ທີ່ສັງກັດໃນໂຄງປະກອບການຈັດຕັ້ງພັກ, ພາຍໃຕ້ການນໍາພາ - ຊີ້ນໍາໂດຍກົງຂອງຄະນະພັກຮາກຖານ ພະແນກເຕັກໂນໂລຊີ ແລະ ການສື່ສານແຂວງ, ມີໜ້າທີ່ສຶກສາອົບຮົມ ການເມືອງ-ແນວຄິດໃຫ້ຄະນະພັກ, ສະມາຊິກພັກ, ພະນັກງານ ຈັດຕັ້ງປະຕິບັດແນວທາງ, ແຜນນະໂຍບາຍ, ມະຕິ, ຄຳສັ່ງ, ຂໍ້ກຳນົດ, ກົດລະບຽບຂອງພັກ ແລະ ກົດໝາຍຂອງລັດວາງ, ເປັນເສນາທິການໃຫ້ແກ່ຄະນະປະຈຳພັກແຂວງ. ມີພາລະບົດບາດຄຸ້ມຄອງມະຫາພາກ ວຽກງານໄປສະນີ ແລະ ໂທລະຄົມມະນາ

ຢູ່ພາຍໃນແຂວງ ການນໍາພາຂອງໜ່ວຍພັກມີ 04 ຂະແໜງຄື: ຂະແໜງ ບໍລິຫານ, ຈັດຕັ້ງ ແລະ ກວດກາ , ຂະແໜງ ໄປສະນີ ແລະ ການສື່ສານ, ຂະແໜງ ບໍລິຫານລັດດິຈິຕອນ ແລະ ຄວາມປອດໄພໄຊເບີ, ຂະແໜງ ເຕັກໂນໂລຊີ ແລະ ນະວັດຕະກໍາ. ມີຫ້ອງການເຕັກໂນໂລຊີ ແລະ ການສື່ສານເມືອງ 03 ເມືອງຄື: ເມືອງປາກລາຍ, ເມືອງຫົງສາ, ເມືອງໄຊຍະບູລີ, ໜ່ວຍພັກ ພະແນກເຕັກໂນໂລຊີ ແລະ ການສື່ສານ ມີສະມາຊິກພັກທັງໝົດ 25 ສະຫາຍ, ຍິງ 10 ສະຫາຍ ໃນນີ້ຄະນະໜ່ວຍພັກ 3 ສະຫາຍ, ຍິງ 1 ສະຫາຍ

  ໃນໄລຍະ 01 ປີຜ່ານມາ ຄະນະພັກໄດ້ເອົາໃຈໃສ່ນໍາພາປະຕິບັດໜ້າທີ່ວິຊາສະເພາະ ນຳພາສ້າງແຜນວຽກປະຈຳອາທິດ, ປະຈຳເດືອນ, 3 ເດືອ, 6 ເດືອນ, ປະຈຳປີ, ແຜນພັດທະນາ 5 ປີ, ແຜນຍຸທະສາດການພັດທະນາ 10 ປີ ແລະ ວິໄສທັດ 20 ປີ; ນຳພາເຄື່ອນໄຫວປະຕິບັດໜ້າທີ່ການເມືອງ ຕາມລະບຽບກົດໝາຍ, ມີການພົວພັນປະສານງານ, ຂັ້ນເທິງ, ຂັ້ນລຸ່ມ, ສາຍຕັ້ງ, ສາຍຂວາງ ທີ່ເປັນລະບົບ ຮັບປະກັນການຄຸ້ມຄອງເສດຖະກິດ-ສັງຄົມ ເເລະ ແກ້ໄຂສິ່ງຫຍໍ້ທໍ້ໃນວຽກງານຂອງຂະແໜງການຕົນ ການຜັນຂະຫຍາຍແນວທາງນະໂຍບາຍຂອງອົງຄະນະພັກແຂວງ ກ່ຽວກັບການຫັນເປັນທັນສະໄໝໃນວຽກງານໄປສະນີ, ໂທລະຄົມມະນາຄົມ ແລະ ການສື່ສານ ໄປຕາມທິດຫັນເປັນດິຈິຕອນຕາມ 3 ເສົາຄໍ້າຄື: ລັດດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນ  

• ວຽກການຫັນເປັນລັດດິຈິຕອນ ໄດ້ມີຄວາມພະຍາຍາມຊຸກຍູ້ໃຫ້ບັນດາພະແນກການອ້ອມຂ້າງແຂວງ, ເມືອງໃນການອອກ ບັນຊີ (User) ນໍາໃຊ້ໃຫ້ພະນັກງານໃນທົ່ວແຂວງ ເພື່ອກະກຽມຫັນມານໍາໃຊ້ລະບົບ (G-Chat) ມາຮອດປະຈຸບັນໄດ້ທັງໝົດ 3.771 ບັນຊີ;  ສ້າງບັນຊີນຳໃຊ້ລະບົບຫ້ອງການທັນສະໄໝ (E-office) ໄດ້ທັງໝົດ 96 ບັນຊີ ເພື່ອການຈໍລະຈອນເອກະສານ, ສ້າງລະບົບການຈັດເກັບ ແລະ ນໍາໃຊ້ເອກະສານຮ່ວມກັນຂອງພາກລັດ (G-Share/G-Drive) ໄດ້ 39 ບັນຊີ, ມີລະບົບກອງປະຊຸມທາງໄກ (Video Conference) ມີ 27 ພະແນກການກົມກອງ ແລະ ສ້າງບັນຊີຜູ້ນຳໃຊ້ (True Conference) ໄດ້ທັງໝົດ 18 ບັນຊີ, ສ້າງລະບົບເວັບໄຊພາກລັດ (G-Web platform) ສໍາເລັດ 05 ເວັບໄຊ.
• ຄະນະພັກໄດ້ຊີ້ນໍາ ຊຸກຍູ້ໃຫ້ບັນດາໜ່ວຍພັກໃນຂົງເຂດໂທລະຄົມ ຂະຫຍາຍສາຍກາບໄຍແກ້ວນໍາແສງ 5,137 ກິໂລແມັດ, ທຽບໃສປີ 2024 ຂະຫຍາຍເພີ້ມຂື້ນ 15.5% ກວມເອົາ 11 ເມືອງ; ເສົາສະຖານີຮັບ-ສົ່ງສັນຍານໂທລະສັບ ມາຮອດປະຈຸບັນມີທັງໝົດ 440 ຕົ້ນ ທຽບໃສປີ 2024 ປະຕິບັດເພີ້ມຂື້ນ 2.09%; ສະຖານີຮັບ-ສົ່ງສັນຍານໂທລະສັບ ( 2G, 3G, 4G ), 5G ມີ 01 ສະຖານີ ລວມທັງໝົດ 917 ສະຖານີ ປະຕິບັດເພີ້ມຂື້ນ 0.11%; ຂະຫຍາຍສັນຍານໂທລະສັບໄປສູ່ບ້ານທີ່ບໍ່ທັນມີສັນຍານໄດ້ 3 ບ້ານປະຈຸບັນ ບ້ານທີ່ມີສັນຍານໂທລະສັບກວມເອົາ 425 ບ້ານ ເທົ່າກັບ 98% ຂອງບ້ານທັງໝົດ; ປະຈຸບັນມີຂະຫຍາຍອິນເຕີເນັດເຂົ້າສູ່ຄົວເຮືອນໄດ້ທັງໝົດ 13,624 ເລກໝາຍ ທຽບໃສ່ປີຜ່ານມາເພີ້ມຂຶ້ນ 39,3% ກວມເອົາ 16% ຂອງຄົວເຮືອນທັງໝົດ;
• ຄະນະພັກໄດ້ມີຄວາມພະຍາຍາມຊຸກຍູ້ໃຫ້ພາກທຸລະກິດ ແລະ ປະຊາຊົນໃນການນໍາໃຊ້ໂປຣແກມ, ສື່ສັງຄົມອອນລາຍ ໃຫ້ຖືກຕ້ອງຕາມລະບຽບການ ເພື່ອບໍ່ໃຫ້ມີການຕ້ານຕໍ່ການນໍາພາຂອງອົງການປົກຄອງແຕ່ລະຂັ້ນພາຍໃນແຂວງ, ຕ້ານການນໍາໃຊ້ເບີໂທລະສັບໄປໃນທາງທີ່ບໍ່ຖືກຕ້ອງ-ສໍ້ໂກງ ໄດ້ສົມທົບກັບ ປກສ ແຂວງ ຕິດຕາມກວດກາເບີໂທລະສັບ ເພື່ອຢັ້ງຢືນການມີຕົວຕົນໄດ້ 14 ເບີ; ກວດຈັບສັນຍານໂທລະສັບ ເພື່ອມ້າງຄະດີໄດ້ 12 ຄັ້ງ; ກວດກາຂໍ້ມູນການໂທເຂົ້າ-ອອກໃນຮູບຄະດີ 13 ຂໍ້ມູນ ຊຶ່ງສາມາດແກ້ໄຂບັນຫາການນໍາໃຊ້ບໍ່ຖືກຕ້ອງໄດ້ໂດຍພື້ນຖານ; ຄະນະພັກໄດ້ຊີ້ນໍາໃຫ້ບັນດາບໍລິສັດໂທລະຄົມມະນາຄົມ ເພີ້ມທະວີໃນການລົງທະບຽນເລກໝາຍໂທລະສັບ ທີ່ເປີດນໍາໃຊ້ທົ່ວແຂວງ ປະຈຸບັນມີທັງໝົດ 282,080 ເລກໝາຍ ທີ່ລົງທະບຽນນໍາໃຊ້ ທຽບໃສ່ປີຜ່ານມາເລກໝາຍເພີ່ມຂຶ້ນ 7,8%.
• ການຄຸ້ມຄອງວຽກງານດ້ານວຽກງານຂົນສົ່ງ ແລະ ໄປສະນີ: ໄດ້ຕິດຕາມກວດກາ ແລະ ຊຸກຍູ້ບໍລິສັດໄປສະນີລາວ ໄດ້ເຄື່ອນໄຫວ ຕິດຕາມ, ກວດກາ ບັນດາບໍລິສັດຜູ້ປະກອບການຈັດສົ່ງ, ແຈກຢາຍ ເຄື່ອງໄປສະນີ ທີ່ເກີດຂື້ນໃໝ່ ແລະ ຕໍ່ໃບຢັ້ງຢືນ ໄດ້ທັງໝົດ 09 ຫົວໜ່ວຍ, ມີ 92 ແຟນຊາຍ ກວມ 11 ເມືອງ, 22 ຕາແສງໃນທົ່ວແຂວງ; ໄປສະນີທົ່ວແຂວງມີ 102 ປ່ອງບໍລິການ ກວມເອົາ 46 ບ້ານ ທຽບໃສ່ປີຜ່ານມາເພີ້ມຂຶ້ນ 23%.
• ການຄຸ້ມຄອງຄື້ນຄວາມຖີ່: ໄດ້ເຄື່ອນໄຫວ ຕິດຕາມ, ກວດກາ ການນຳໃຊ້ຄື້ນຄວາມຖີ່ວິທະຍຸສື່ສານ (ໂຟນີ), ການນຳໃຊ້ຄື້ນຄວາມຖີ່ເຄື່ອງບິນບໍ່ມີຄົນຂັບ (ໂດຼນ), ກວດກາຈຸດເຊື່ອມຕໍ່ສັນຍານຂ້າມແດນຢູ່ເມືອງເຂດຊາຍແດນ, ຄື້ນສັນຍານລົບກວນຕ່າງໆ;

          ຜົນການກວດກາຕີລາຄາແບ່ງ​ປະ​ເພດສະມາຊິກພັກ ແລະ ໜ່ວຍພັກ ປະຈຳປີ2025 ມີດັ່ງນີ້: ສະມາຊິພັກ ໄດ້ປະເພດແຂງ 22 ສະຫາຍ, ຍິງ 9 ສະຫາຍ, ບໍ່ແບ່ງ 03 ສະຫາຍ, ຍິງ 01 ສະຫາຍ. ອົງການຈັດມະຫາຊົນ ໄດ້ປະເພດແຂງ, ຕີລາຄາການນໍາພາຂອງໜ່ວຍພັກຕາມ 5 ເນື້ອໃນ: ການນໍາພາດ້ານການເມືອງ ປະຕິບັດໄດ້ 9 ຄະແນນ, ການນໍາພາດ້ານແນວຄິດປະຕິບັດໄດ້ 9 ຄະແນນ, ການນໍາພາດ້ານການຈັດຕັ້ງ ປະຕິບັດໄດ້ 9 ຄະແນນ, ດ້ານແບບແຜນການນໍາພາປະຕິບັດໄດ້ 9 ຄະແນນ, ດ້ານການນໍາພາປະຕິບັດໜ້າທີ່ການເມືອງ ປະຕິບັດໄດ້ 10 ຄະແນນ. ໜ່ວຍພັກໄດ້ປະເພດ ແຂງ (ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ). ໃນພິທີຄະນະໝ່ວຍພັກ, ຂະແໜງການ, ອົງການຈັດຕັ້ງມະຫາຊົນກໍ່ໄດ້ຂື້ນຈັບມືແຂ່ງຂັນກັນເພື່ອພ້ອມກັນຈັດຕັ້ງປະຕິບັດແຜນການສ້າງໝ່ວຍພັກປອດໃສ, ເຂັ້ມແຂງ, ໝັກແໝ້ນຂອງໝ່ວຍພັກ ປະຈຳປີໃຫ້ບັນລຸຄາດໜາຍທີ່ວາງໄວ້. 

ຂ່າວໂດຍ: ໜໍ່ແກ້ວ ທິແກ້ວ

ຕັດຕໍ່-ຮູບພາບໂດຍ: ສຸທິນ ມູນຖິ່ນໄທ