ກອງປະຊຸມສະຫຼຸບການກໍ່ສ້າງໝ່ວຍພັກປອດໃສ, ເຂັ້ມແຂງ, ໝັກແໝ້ນ ໜ່ວຍພັກບໍລິສັດ ອີທີແອລ ຈຳກັດ ທີ່ຂື້ນກັບຄະນະພັກຮາກຖານພະແນກເຕັກໂນໂລຊີ ແລະ ການສື່ສານແຂວງ ໄດ້ຈັດຂື້ນໃນຕອນແລງຂອງວັນທີ 29 ເມສາ 2026 ທີ່ຫ້ອງປະຊຸມຂອງບໍລິສັດ ອີທີແອລ ຈໍາກັດ ພາຍໃຕ້ການເປັນປະທານຂອງ ສະຫາຍ ​ຄຳ​ພຸດ ວິ​ລະ​ວົງ  ຄະນະພັກຮາກຖານ, ເລຂາໜ່ວຍພັກ, ຜູ້ອໍານວຍການບໍລິສັດ ອີທີແອລ ຈໍາກັດ, ເປັນກຽດເຂົ້າຮ່ວມຂອງສະຫາຍ ນິລັນດອນ ຈິດຕະກອນ ຮອງເລຂາຄະນະພັກຮາກຖານ, ຮອງຫົວໜ້າພະແນກເຕັກໂນໂລຊີ ແລະ ການສື່ສານແຂວງ ມີຄະນະທີມງານຂອງແຂວງ, ບັນດາສະຫາຍຄະນະໜ່ວຍພັກ, ສະມາຊິກພັກທັງໝົດເຂົ້າຮ່ວມ.

          ສະຫາຍ ​ຄຳ​ພຸດ ວິ​ລະ​ວົງຄະນະພັກຮາກຖານ, ເລຂາໜ່ວຍພັກ, ຜູ້ອໍານວຍການບໍລິສັດ ອີທີແອລ ຈໍາກັດ ໄດ້ຂື້ນຜ່ານບົດສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2025 ແລະ ທິດທາງແຜນການ ປະຈໍາປີ 2026 ໜ່ວຍພັກບໍລິສັດ ອີທີແອລ ຈຳກັດ ທີ່ສັງກັດໃນໂຄງປະກອບການຈັດຕັ້ງພັກ, ພາຍໃຕ້ການນໍາພາ-ຊີ້ນໍາໂດຍກົງຂອງຄະນະພັກຮາກຖານພະແນກເຕັກໂນໂລຊີ ແລະ ການສື່ສານແຂວງ, ມີໜ້າທີ່ສຶກສາອົບຮົມການເມືອງ-ແນວຄິດໃຫ້ຄະນະພັກ, ສະມາຊິກພັກ, ພະນັກງານ ຈັດຕັ້ງປະຕິບັດແນວທາງ, ແຜນນະໂຍບາຍ, ມະຕິ, ຄຳສັ່ງ, ຂໍ້ກຳນົດ, ກົດລະບຽບຂອງພັກ ແລະ ກົດໝາຍຂອງລັດວາງອອກ. ບໍລິສັດ ອີທີແອລ ຈຳກັດ ສາຂາແຂວງໄຊຍະບູລີ ເປັນເສນາທິການໃຫ້ແກ່ຄະນະປະຈຳພັກແຂວງ ໂດຍຜ່ານການຄຸ້ມຄອງມະຫາພາກຈາກພະແນກ ຕສ ແຂວງ ແລະ ເປັນເສນາທິການໂດຍກົງໃຫ້ແກ່ ບໍລິສັດ  ອີທີແອລ ຈຳກັດ ສູນກາງ, ມີ​ຄະນະ​ໜ່ວຍ​ພັກ 3 ສະຫາຍ, ການນໍາພາຂອງໜ່ວຍພັກກວມເອົາ 3 ພາກສ່ວນຄື: ພາກສ່ວນບໍລິຫານ, ພາກສ່ວນເຕັກນິກ ແລະ ພາກສ່ວນການຕະຫຼາດ, ການນໍາພາ-ຄຸ້ມຄອງດ້ານວິຊາສະເພາະກວມເອົາ 2 ສູນບໍລິການປະຈຳເມືອງຄື: ສູນບໍລິການເມືອງປາກລາຍ ແລະ ສູນບໍລິການປະຈຳເມືອງຫົງສາ. ບໍລິສັດ ອີທີແອລ ຈຳກັດ ສາຂາແຂວງ ມີພະນັກງານທັງໝົດ 18 ຄົນ, ຍິງ 10 ຄົນ​ ໃນ​ນີ້: ມີ​ສະມາຊິກ​ພັກ 9 ສະຫາຍ, ຍິງ 4 ສະຫາຍ ອົງການຈັດຕັ້ງມະຫາຊົນ: ຊາວໜຸ່ມ, ແມ່ຍິງ ແລະ ກໍາມະບານ; ໃນໄລຍະ 1 ປີຜ່ານມາ ຄະນະໜ່ວຍພັກກໍ່ໄດ້ເອົາໃຈໃສ່ນໍາພາ-ຊີ້ນໍາ ການຈັດຕັ້ງປະຕິບັດວຽກງານ ວິຊາສະເພາະທີ່ຢູ່ໃນຂອບເຂດຄວາມຮັບຜິດຊອບຂອງຕົນ ດ້ວຍຄວາມຮັບຜິດຊອບສູງ ແລະ ມີຜົນສໍາເລັດຫຼາຍດ້ານເຊັ່ນ: ມີສະຖານີ 2G ມີ: 95 ສະຖານີ, ສັນຍານກວມ 159 ບ້ານ ເທົ່າກັບ 36.97%, ສະຖານີ 3G ມີ: 14 ສະຖານີ, ສັນຍານກວມ 19 ບ້ານ ເທົ່າກັບ 4.41%, ສະຖານີ 4G ມີ: 96 ສະຖານີ, ສັນຍານກວມ 142 ບ້ານເທົ່າກັບ 33.02%, ຂື້ນທະບຽນເລກໝາຍໂທລະສັບມືຖືທັງໝົດ 4,531 ເລກໝາຍ ໃນຈໍານວນເລກໝາຍທັງໝົດທົ່ວແຂວງ 6,000 ເລກໝາຍ ກວມເອົາ 75.51%, ໄດ້ເຄື່ອນໄຫວລົງໂຄສະນາປະຊາສຳພັນ ຂາຍຜະລິດຕະພັນ ອີທີແອລໃໝ່ໆ ພ້ອມນຳເອົາເຕັກນິກອັນໃໝ່ ແລະ ໂປຼໂມຊັນດີໆລົງໄປສູ່ລູກຄ້າ ຕາມສຳນັກງານຫ້ອງການ,ໂຮງຮຽນ, ເຂດຊຸມຊົນ ແລະ ເຂດຫ່າງໄກສອຫລີກ ຂອງແຂວງຢ່າງທົ່ວເຖິງ, ສ້າງກິດຈະກຳເປີດບູດຈຳໜ່າຍສິນຄ້າໃນງານບຸນສຳຄັນຕ່າງໆສ້າງລາຍຮັບໄດ້ 18.724 ລ້ານກວ່າກີບ ທຽບໃສ່ແຜນປີ 99%, ມອບ​ອາກອນ​ໃຫ້​ລັດໄດ້ 1.702ລ້ານກວ່າກີບ, ທຽບໃສ່ແຜນປີໄດ້ 88% ແລະ ກໍາໄລ​ສຸດທິ​ໄດ້​ທັງ​ໝົດ 4.448 ລ້ານກວ່າກີບ, ໄດ້ອຸປະຖຳສັງຄົມລວມທັງໝົດ=   120.740.000  ກີບ.

          ຜົນການກວດກາຕີລາຄາແບ່ງ​ປະ​ເພດສະມາຊິກພັກ ແລະ ໜ່ວຍພັກ ປະຈຳປີ2025ມີດັ່ງນີ: ສະມາຊິພັກ ໄດ້ປະເພດແຂງ 9 ສະຫາຍ, ຍິງ 4 ສະຫາຍ, ພາກສ່ວນ ໄດ້ປະເພດ ແຂງ, ອົງການຈັດມະຫາຊົນ ໄດ້ປະເພດແຂວງ ຕີລາຄາການນໍາພາຂອງໜ່ວຍພັກຕາມ 5 ເນື້ອໃນ: ການນໍາພາດ້ານການເມືອງ ປະຕິບັດໄດ້ 9 ຄະແນນ, ການນໍາພາດ້ານແນວຄິດປະຕິບັດໄດ້ 9 ຄະແນນ, ການນໍາພາດ້ານການຈັດຕັ້ງ ປະຕິບັດໄດ້ 9 ຄະແນນ, ດ້ານແບບແຜນການນໍາພາປະຕິບັດໄດ້ 9 ຄະແນນ, ດ້ານການນໍາພາປະຕິບັດໜ້າທີ່ການເມືອງ ປະຕິບັດໄດ້ 9 ຄະແນນ. ໜ່ວຍພັກ ໄດ້ປະເພດ ແຂງ (ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ). ໃນພິທີຄະນະໝ່ວຍພັກ, ອົງການຈັດຕັ້ງມະຫາຊົນກໍ່ໄດ້ຂື້ນຈັບມືແຂ່ງຂັນກັນເພື່ອພ້ອມກັນຈັດຕັ້ງປະຕິບັດແຜນການສ້າງໝ່ວຍພັກປອດໃສ, ເຂັ້ມແຂງ, ໝັກແໝ້ນຂອງໝ່ວຍພັກ ປະຈຳປີໃຫ້ບັນລຸຄາດໜາຍທີ່ວາງໄວ້. 

ຂ່າວໂດຍ: ສົມບັດ ສີສະຫວາດ

ຕັດຕໍ່-ຮູບພາບໂດຍ: ສຸທິນ ມູນຖິ່ນໄທ