ເນື່ອງໃນໂອກາດສົ່ງທ້າຍປີເກົ່າ, ຕ້ອນຮັບປີໃໝ່ລາວປີ ພສ 2569 ຄະນະອຳນວຍການ ຂອງບັນດາບໍລິສັດໄປສະນີ ແລະ ບໍລິສັດໂທລະຄົມມະນາຄົມ ພາຍໃນແຂວງໄຊຍະບູລີ ເຂົ້າມາອວຍພອນຄະນະພັກ, ຄະນະນຳ ຂອງພະແນກເຕັກໂນໂລຊີ ແລະ ການສື່ສານແຂວງ, ໂດຍໃຫ້ກຽດກ່າວຕ້ອນຮັບໂດຍ ທ່ານ ສອນສະຫວັນ ຈັນທະວົງ ເລຂາຄະນະພັກຮາກຖານ ຫົວໜ້າພະແນກ ເຊີ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານອັນພົ້ນເດັ່ນໃນໄລຍະ 01 ປີຜ່ານມາໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານຂອງຂະແໜງການເຕັກໂນໂລຊີ ແລະ ການສື່ສານ (ຕສ) ທີ່ມີຄວາມພະຍາຍາມ ສູ້ຊົນຢ່າງສູງໃນການຂັບເຄື່ອນວຽກງານ ຕສ ຕາມແນວທາງຂອງພັກ-ລັດຖະບານ ແລະ ຕາມສາມເສົາຄ້ຳການຫັນເປັນດິຈິຕອນຄື: ລັດດິຈິຕອນ, ເສດຖະກິດດິຈິຕອນ, ສັງຄົມດິຈິຕອນ;

ສໍາລັບເສົາຄໍ້າທີ 1: ການຫັນເປັນ ລັດດິຈິຕອນ ພະແນກໄດ້ມີຄວາມພະຍາຍາມຊຸກຍູ້ໃຫ້ບັນດາພະແນກການອ້ອມຂ້າງແຂວງ, ເມືອງໃນການອອກ ບັນຊີນໍາໃຊ້ໃຫ້ພະນັກງານໃນທົ່ວແຂວງ ເພື່ອກະກຽມຫັນມານໍາໃຊ້ລະບົບ (G-Chat) ໄດ້ທັງໝົດ 3.771 ຄົນ ກວມເອົາ 41% ຂອງພະນັກງານທັງໝົດໃນທົ່ວແຂວງ;  ສ້າງລະບົບບັນຊີຫ້ອງການທັນສະໄໝ (E-office) ໄດ້ທັງໝົດ 96 ບັນຊີ ເພື່ອຫັນເປັນລະບົບລາຍເຊັນ ເອເລັກໂຕນິກໃນການສັ່ງຈ່າຍງົບປະມານການເງິນ ແລະການຈໍລະຈອນເອກະສານ, ສ້າງລະບົບການຈັດເກັບ ແລະ ນໍາໃຊ້ເອກະສານຮ່ວມກັນຂອງພາກລັດ (G-Share/G-Drive) ໄດ້ 39 ບັນຊີ, ປະຈຸບັນທົ່ວແຂວງ ມີລະບົບກອງປະຊຸມທາງໄກ (Video Conference) ມີ 27 ພະແນກການກົມກອງ ແລະ ສ້າງບັນຊີຜູ້ນຳໃຊ້ (True Conference) ໄດ້ທັງໝົດ 18 ບັນຊີ, ສ້າງລະບົບເວັບໄຊພາກລັດ (G-Web platform) ສໍາເລັດ 05 ເວັບໄຊ; ພະແນກການທີ່ພົ້ນເດັ່ນໃນການຫັນເປັນລັດດິຈິຕອນປະຈຸບັນມີພະແນການເງິນແຂວງ ທີ່ພວມຫັນການຈັດເກັບລາຍຮັບ-ຄຸ້ມຄອງລາຍຈ່າຍສູ່ຄວາມທັນສະໄໝ, ນໍາໃຊ້ໂປຣແກມພາກລັດໃນການລົງລາຍເຊັນເອເລັກໂຕຣນິກ; ຂົງເຂດ ປກສ ໄດ້ມີຄວາມພະຍາຍາມ ອອກບັດປະຈໍາຕົວ ແລະປື້ມສໍາມະໂນຄົວໄປສູ່ດິຈິຕອນ ນອກຈາກນັ້ນຍັງມີຂະແໜງການອື່ນໆ ຕື່ມອີກຈໍານວນໜຶ່ງ;

ເສົາຄໍ້າທີ 2: ການຫັນເປັນເສດຖະກິດດິຈິຕອນ ກ່ອນອື່ນໝົດຂະແໜງເຕັກໂນໂລຊີ ແລະການສື່ສານແຂວງ ໄດ້ມີຄວາມພະຍາຍາມໃນການຊຸກຍູ້ໃຫ້ມີການລົງທະບຽນນໍາໃຊ້ໂທລະສັບທີ່ເປີດນໍາໃຊ້ທັງໝົດ 282,080 ເລກໝາຍ ທຽບໃສ່ປີຜ່ານມາເພີ່ມຂຶ້ນ 7,8%; ຊຸກຍູ້ການຂະຫຍາຍສັນຍານໂທລະສັບໄປສູ່ບ້ານທີ່ບໍ່ທັນມີສັນຍານໄດ້ 3 ບ້ານປະຈຸບັນ ບ້ານທີ່ມີສັນຍານໂທລະສັບກວມເອົາ 425 ບ້ານ ເທົ່າກັບ 98% ຂອງບ້ານທັງໝົດ; ຂະຫຍາຍອິນເຕີເນັດເຂົ້າສູ່ຄົວເຮືອນໄດ້ທັງໝົດ 13,624 ເລກໝາຍ ທຽບໃສ່ປີຜ່ານມາເພີ້ມຂຶ້ນ 39,3% ກວມເອົາ 16% ຂອງຄົວເຮືອນທັງໝົດ; ດ້ານວຽກງານຂົນສົ່ງໄປສະນີ ທົ່ວແຂວງມີ 102 ປ່ອງບໍລິການ ກວມເອົາ 46 ບ້ານ ທຽບໃສ່ປີຜ່ານມາເພີ້ມຂຶ້ນ 23%; ການບໍລິການດ້ານໂທລະຄົມມະນາຄົມສາມາດສ້າງລາຍຮັບໄດ້ທັງໝົດ 189,319 ລ້ານກວ່າກີບກວມເອົາ 2% ຂອງ GDP ຂອງແຂວງ ທຽບໃສ່ປີຜ່ານມາເພີ້ມຂຶ້ນ 6,78%;

ສ່ວນການຫັນເປັນເສົາຄໍ້າທີ 3: ສັງຄົມດິຈິຕອນ ພະແນກໄດ້ມີຄວາມພະຍາຍາມຊຸກຍູ້ໃຫ້ພາກທຸລະກິດ ແລະປະຊາຊົນໃນການນໍາໃຊ້ໂປຣແກມ, ສື່ສັງຄົມອອນລາຍ ໃຫ້ຖືກຕ້ອງຕາມລະບຽບການ ເພື່ອບໍ່ໃຫ້ມີການຕ້ານຕໍ່ການນໍາພາຂອງອົງການປົກຄອງແຕ່ລະຂັ້ນພາຍໃນແຂວງ, ຕ້ານການນໍາໃຊ້ເບີໂທລະສັບໄປໃນທາງທີ່ບໍ່ຖືກຕ້ອງ-ສໍ້ໂກງ ຊຶ່ງໃນ ໜຶ່ງປີຜ່ານມາໄດ້ສົມທົບກັບ ປກສ ແຂວງ ຕິດຕາມກວດກາເບີໂທລະສັບ ເພື່ອຢັ້ງຢືນການມີຕົວຕົນໄດ້ 14 ເບີ; ກວດຈັບສັນຍານໂທລະສັບເພື່ອມ້າງຄະດີໄດ້ 12 ຄັ້ງ; ກວດກາຂໍ້ມູນການໂທເຂົ້າ-ອອກໃນຮູບຄະດີ 13 ຂໍ້ມູນ ຊຶ່ງສາມາດແກ້ໄຂບັນຫາການນໍາໃຊ້ບໍ່ຖືກຕ້ອງໄດ້ໂດຍພື້ນຖານ; ສິ່ງທີ່ພົ້ນເດັ່ນ ເພື່ອໃຫ້ປະຊາຊົນເຂົ້າເຖິງການສ່ອງແສງການຕ້ານການຫລອກລ່ວງສູນກາງໄດ້ເປີດນຳໃຊ້ສູນຕ້ານການຫຼອກລວງທາງອອນລາຍ AOC 1533 ເພື່ອໃຫ້ພໍ່ແມ່ປະຊາຊົນໂທໄປສອບຖາມຂໍ້ມູນດ້ານໂທລະຄົມມະນາຄົມ ແລະການນໍາໃຊ້ສື່ສັງຄົມອອນລາຍໄປຕາມແນວທາງທີ່ຖືກຕ້ອງ.

ໃນຕອນທ້າຍ ທ່ານ ສອນສະຫວັນ ຈັນທະວົງ ເລຂາຄະນະພັກຮາກຖານ ຫົວໜ້າພະແນກ ຕສ ແຂວງ ກໍ່ໄດ້ອວຍພອນໄຊອັນປະເສີດ ມາຍັງບັນດາຄະນະພັກ, ຄະນະນຳ ຂອງບັນດາບໍລິສັດໄປສະນີ ແລະ ໂທລະຄົມມະນາຄົມພາຍໃນແຂວງ ຕະຫຼອດຮອດພະນັກງານລັດຖະກອນທັງໝົດ ຂົງເຂດເຕັກໂນໂລຊີ ແລະ ການສື່ສານ ຈົ່ງພ້ອມພຽງກັນນຳເອົາແຜນພັດທະນາວຽກງານ ເຕັກໂນໂລຊີ ແລະ ການສື່ສານ ແຂວງໄຊຍະບູລີ 5 ປີ (2026​-2030) ເຊີ່ງປະກອບມີ 07 ໜ້າທີ່ຫຼັກ  ແລະ 03 ເປົ້າໝາຍການພັດທະນາ ແລະ 07 ແຜນງານຈຸດສຸມ ນຳໄປຈັດຕັ້ງຜັນຂະຫຍາຍຢູ່ແຕ່ລະຂົງເຂດ ໃຫ້ບັນລຸຕາມຈຸດປະສົງ ແລະ ລະດັບຄາດໝາຍ ໃນຕໍ່ໜ້າຢ່າງມີປະສິດທິຜົນ ແລະອວຍພອນໃຫ້ອ້າຍເອື້ອຍນ້ອງໃນຂົງເຂດໂທລະຄົມມະນາຄົມ ແລະການສື່ສານໃນທົ່ວແຂວງ ມີແຕ່ຄວາມຜາສຸກ, ຄວາມຈະເລີນ.

ພາບ-ຂ່າວໂດຍ: ພະແນກ ຕສ ແຂວງໄຊຍະບູລີ.