ໃນຕອນເຊົ້າວັນ​ທີ 18 ມີນາ 2026 ພະ​ແນກເຕັກໂນໂລຊີ ແລະ ການສື່ສານແຂວງ ເປີດກອງປະຊຸມປຶກສາຫາລື ການແກ້ໄຂພະລັງງານ (ນໍ້າມັນ) ສະໜອງໃຫ້ແກ່ລະບົບໄປສະນີ ແລະ ໂທລະຄົມມະນາຄົມ ຂື້ນຢູ່ທີ່​ຫ້ອງ​ປະຊຸມ ຂອງພະແນກເຕັກໂນໂລຊີ ແລະ ການສື່ສານແຂວງ; ​ໂດຍການເປັນປະທານ ຂອງ ທ່ານ ສອນສະຫວັນ ຈັນທະວົງ  ຫົວໜ້າພະແນກເຕັກໂນໂລຊີ  ແລະ ການສື່ສານ ແຂວງໄຊຍະບູລີ; ມີຕາງໜ້າຈາກພະແນກອຸດສາຫະກຳ ແລະ ການຄ້າແຂວງ, ບໍລິສັດລັດວິສາຫະກິດໄຟຟ້າລາວ ສາຂາ ແຂວງໄຊຍະບູລີ, ອຳນວຍການ, ຮອງອຳນວຍການ ສາຂາບໍລິສັດ ໄປສະນີລາວ ຈຳກັດ, ສາຂາບໍລິສັດສະຕາໂທລະຄົມ ຈຳກັດ, ສາຂາບໍລິສັດລາວໂທລະຄົມມະນາຄົມ ມະຫາຊົນ, ສາຂາບໍລິສັດອີທີແອວ ຈຳກັດ ແລະ ຫົວໜ້າຂະແໜງ, ຮອງຂະແໜງ ທີ່ກ່ຽວຂ້ອງ ພາຍໃນພະແນກ ເຂົ້າຮ່ວມທັງໝົດ 10 ທ່ານ.​

          ເພື່ອກຽມຄວາມພ້ອມໃນຊ່ວງວິກິດ ແລະ ຮັບປະກັນໃຫ້ແກ່ການສະໜອງສັນຍານໂທລະສັບ ແລະ ອິນເຕິເນັດພາຍໃນແຂວງຢ່າງເປັນປົກກະຕິ ກອງປະຊຸມປຶກສາຫາລືໃນຄັ້ງນີ້ ໄດ້ມີການກຳນົດການປັບປຸງ, ບໍາລຸງຮັກສາ ແລະ ສ້ອມແປງ ລະບົບໄຟຟ້າ, ການສະໜອງນໍ້າມັນ ໃຫ້ບັນດາ ສາຂາບໍລິສັດ ໂທລະຄົມມະນາຄົມ ລົງເຄື່ອນໄຫວ ແລະ ບໍາລຸງຮັກສາ, ການກຳນົດໂຄງສ້າງລາຄາ ການຂົນສົ່ງຮັບ-ຝາກດ້ານໄປສະນີພັນ ຂອງບັນດາບໍລິສັດໄປສະນີ ແລະ ຂົນສົ່ງດ່ວນ, ການສື່ສານ (ລະບົບໂທລະຄົມມະນາຄົມ) ພາຍໃນແຂວງສາມາດໃຊ້ໄດ້ຢ່າງເປັນປົກກະຕິ;

          ນອກຈາກນີ້ ປະທານກອງປະຊຸມຍັງໄດ້ໂອ້ລົມ ແລະ ໄດ້ມີບາງຄໍາເຫັນກ່ຽວກັບກອງປະຊຸມໃນຄັ້ງນີ້ເປັນຕົ້ນແມ່ນການສັງລວມ ຄວາມດຸນດ່ຽງ, ຄວາມຕ້ອງການຊົມໃຊ້ນໍ້າມັນ ຂອງສາຂາບໍລິສັດໂທລະຄົມມະນາຄົມ; ການກຳນົດ ແລະ ການເໜັງຕີງໂຄງສ້າງລາຄາ ຮັບ-ຝາກ ໄປສະນີພັນ, ສັງລວມ ຂໍ້ມູນ ຈຸດທີ່ຕັ້ງສະຖານີ, ຈຸດຫຼໍ່ແຫຼມທີ່ຕິດພັນ ຂອງບໍລິສັດໂທລະຄົມມະນາຄົມ ກັບ ບໍລິສັດລັດວິສະຫະກິດໄຟຟ້າລາວ ເພື່ອສ້າງຄວາມເປັນເອກະພາບ ໃນການປະຕິບັດໜ້າທີ່ວຽກງານ.

ຂ່າວໂດຍ: ສຸທິນ ມຸນຖິ່ນໄທ

ພາບ: ນາງ ສຸນິດາ ສົມສີ