ຈຸດປະສົງໃນການຈັດສຳມະນາກາງເທີມ ຂອງໂຄງການ ທີ່ປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ (Interim report Seminar on Consultation for Improvement of Lao National Certificate Authority) ໃນຄັ້ງນີ້ ແມ່ນເພື່ອປຶກສາຫາລື ກ່ຽວກັບບົດລາຍງານກາງເທີມຮ່ວມກັນ ພ້ອມທັງເປີດກວ້າງໃຫ້ບັນດາທ່ານຜູ້ຕາງໜ້າຈາກ ສປປ ລາວ ໄດ້ປະກອບຄຳຄິດຄຳເຫັນໃສ່ບົດລາຍງານກາງເທີມ ເພື່ອໃຫ້ ມີຄວາມຄົບຖ້ວນສົມບູນ, ສາມາດນຳໄປເປັນແບບແຜນ-ແນວທາງໃນການຍົກລະດັບລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ ໃຫ້ມີປະສິດທິພາບທຽບເທົ່າກັບສາກົນ.

ສຳມະນາດັ່ງກ່າວ, ທ່ານ ແກ້ວວິສຸກ ໂສລະພົມ ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ທ່ານ ເຊ ຊູຮອນ ທີ່ປຶກສາອາວຸໂສ ຈາກ ສະຖາບັນການພັດທະນາ ສ.ເກົາຫຼີ (KDI) ໄດ້ມີຄຳເຫັນຕໍ່ກັບສຳມະນາ ເຮັດໃຫ້ຜູ້ເຂົ້າຮ່ວມສຳມະນາໄດ້ຮັບຮູ້ເຖິງຄວາມໝາຍຄວາມສຳຄັນຂອງໂຄງການປຶກສາເພື່ອຍົກລະດັບ ລະບົບອອກໃບຮັບຮອງລາຍເຊັນເອເລັກໂຕຣນິກ ຂອງ ສປປ ລາວ ຊຶ່ງປຽບເໝືອນເປັນຕົວຊີ້ວັດ, ຕົວປະເມີນຄືນຄວາມອາດສາມາດຂອງລະບົບລາຍເຊັນເອເລັກໂຕຣນິກ ຂອງ ສປປ ລາວ ທີ່ມີຢູ່ໃນປັດຈຸບັນ, ວິເຄາະຫາຄວາມຕ້ອງການໃນການປັບປຸງຍົກລະດັບລະບົບເກົ່າ, ແຜນການຂະຫຍາຍ ແລະ ສ້າງລະບົບໃໝ່ ໂດຍປຽບທຽບໃສ່ແນວທາງການຫັນເປັນດິຈິຕອນ ແລະ ການພັດທະນາເສດຖະກິດດິຈິຕອນ ຂອງ ສປປ ລາວ ໃນປັດຈຸບັນ ສ້າງເປັນແຜນເພີ່ມຂີດຄວາມສາມາດທັງດ້ານນິຕິກຳ, ດ້ານມາດຕະຖານເຕັກນິກ, ດ້ານການບໍລິການ, ດ້ານເຕັກນິກ ແລະ ດ້ານບຸກລະຄາກອນ ເພື່ອໃຫ້ຮັບປະກັນໃນການຮັບໃຊ້ແກ່ສັງຄົມ