ຈຸດປະສົງຂອງກອງປະຊຸມນີ້, ແມ່ນເພື່ອປືກສາຫາລື, ຮັບຟັງການລາຍງານຄວາມຄືບໜ້າທາງເຕັກນິກໃນ ການຈັດຕັ້ງປະຕິບັດ ການພັດທະນາ ແລະ ການທົດລອງ ລະບົບ Smart office Platform ແລະ ລະບົບສື່ສານ G-chat ພ້ອມທັງ ປຶກສາຫາລື ແຜນການຕໍ່ໜ້າ ເປັນຕົ້ນ: ການທົດລອງນໍາໃຊ້, ການຝືກອົບຮົມ ແລະ ການເປີດນໍາໃຊ້ຢ່າງເປັນທາງການ ເພື່ອໃຫ້ບັນດາລະບົບສາມາດ ປະຍຸກເຂົ້າໃນວຽກງານການບໍລິຫານລັດ ໃຫ້ມີປະສິດດທິພາບ ແລະ ປະສີດທີຜົນ ແລະ ສອດຄ່ອງກັບຄວາມຕ້ອງການຂອງພາກລັດ. ພ້ອມດຽວກັນນີ້, ບໍລິສັດ CAIH ໄດ້ລາຍງານສະພາບລວມໃນການພັດທະນາລະບົບຫ້ອງການລັດທັນສະໄໝ ເຊີ່ງໃນໄລຍະຜ່ານມາໄດ້ມີການລິເລີ່ມພັດທະນາ ຕັ້ງແຕ່ເດືອນ ກັນຍາ ປີ 2024 ໄດ້ນໍາສະເໜີ ຄວາມສາມາດຂອງລະບົບ (features / function), ຄວາມຄືບໜ້າຂອງການພັດທະນາເຕັກນິກ. ພ້ອມນັ້ນ, ຍັງໄດ້ມີການນຳສະເໜີຕົວຢ່າງ, ວິທີການ ແລະ ຂັ້ນຕອນ ການນຳໃຊ້ລະບົບດັ່ງກ່າວ ໃຫ້ກັບ ຜູ້ເຂົ້າຮ່ວມໄດ້ຮັບຮູ້ ເຊັ່ນ: ລະບົບການບໍລິຫານຈັດການເອກະສານ, ລະບົບການສື່ສານພາກລັດ , ແລະ ບັນດາລະບົບທີ່ມີການຕິດພັນກັບການເຮັດວຽກຂອງອົງການຈັດຕັ້ງພັກ-ລັດ.

ກອງປະຊຸມຄັ້ງນີ້, ໄດ້ມີການແລກປ່ຽນຄຳຄິດເຫັນ ລະຫວ່າງ ທີມພັດທະນາ ຈາກ ບໍລິສັດ CAIH ແລະ ຜູ້ເຂົ້າຮ່ວມ ຢ່າງຟົດຟື້ນ, ເຊິ່ງຜູ້ເຂົ້າຮ່ວມ ໄດ້ມີຄຳຖາມເຈາະຈິ້ມ ທາງດ້ານຮູບແບບການນຳໃຊ້,ຄວາມສາມາດໃນການຂະຫຍາຍລະບົບ ແລະ ການເຊື່ອມໂຍງເຮັດວຽກ ກັບລະບົບທີມີຢູ່, ພ້ອມທັງ ຂໍ້ສະເໜີໃນການປັບປຸງ ບາງອົງປະກອບເພື່ອໃຫ້ຕອບໂຈດກັບສະພາບຂອງແຕ່ລະຫ້ອງການ.

 

ຕອນທ້າຍ, ທ່ານ ແກ້ວວິສຸກ ໂສລະພົມ ໄດ້ໃຫ້ກຽດມີຄຳເຫັນຕໍ່ກອງປະຊຸມ ຊຶ່ງທ່ານໄດ້ກ່າວວ່າ: ປະຈຸບັນ ສ.ປ.ປ.ລາວ ມີຄວາມເນັ້ນຍ້ຳໃນການພັດທະນາວຽກງານ ການຫັນເປັນດິຈິຕອນ ເຊິ່ງໄດ້ສະແດງອອກ ໂດຍການກຳນົດ 03 ເສົາຄໍ້ຳຍຸດທະສາດຄື: ລັດດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນ. ການພັດທະນາລະບົບ Smart Office Platform ແລະ ປັບປຸງລະບົບສື່ວານພາກລັດ G-chat ຖືວ່າເປັນບາດກ້າວໜຶ່ງທີ່ສຳຄັນ ໃຫ້ແກ່ ການພັດທະນາ ລັດດິຈິຕອນ, ພຣັດຟອມນີ້ ເປັນເຄື່ອງມືອັນສໍາຄັນ ທີ່ຈະຊ່ວຍໃຫ້ການເຮັດວຽກຂອງອົງການຈັດຕັ້ງພັກ-ລັດ ມີຄວາມສະດວກ, ວ່ອງໄວ, ທັນສະໄໝ ແລະ ປອດໄພ ໂດຍການຊ່ວຍຫຼຸດຜ່ອນເວລາການເຮັດວຽກຂອງພະນັກງານ ແຕ່ປະສິດທິພາບການເຮັດວຽກຍັງຄືເກົ່າ. ພ້ອມດຽວກັນນັ້ນ, ລະບົບດັ່ງກ່າວ ຍັງຈະຊ່ວຍ ເສີມສ້າງຄວາມເຂັ້ມແຂງໃຫ້ແກ່ ພະນັກງານລັດຖະກອນ ໃນຂອບເຂດທົ່ວປະເທດ ໃຫ້ມີຄວາມຮູ້ໃນການປະຍຸກ ແລະ ນຳໃຊ້ເຄື່ອງມືດິຈິຕອນ ເຂົ້າມາໝູນໃຊ້ໃນວຽກງານຂອງຕົນໃຫ້ມີປະສິດທິຜົນ”. ພ້ອມທັງ ໃຫ້ຮັບປະກັນ ຄວາມສາມາດເຊື່ອມໂຍງບັນດາລະບົບດັ່ງກ່າວນີ້ ເຂົ້າກັບລະບົບທີ່ມີຢູ່ໃນປະຈຸບັນ ແລະ ພ້ອມທັງເຊື່ອມໂຍງບັນດາຂໍ້ມູນຂອງພັກ-ລັດ ໄດ້ຢ່າງມີປະສິດທິພາບ ແລະ ຮັບປະກັນການສ້າງຄວາມອາດສາມາດໃຫ້ບຸກຄະລາກອນພາກລັດໃນການນໍາໃຊ້.