ກອງປະຊຸມໃຫຍ່ສະມາຊິກພັກ ຄັ້ງທີ II ຂອງຄະນະພັກຮາກຖານພະແນກເຕັກໂນໂລຊີ ແລະ ການສື່ສານແຂວງໄຊຍະບູລີ, ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 17 ທັນວາ 2024 ນີ້, ຢູ່ທີ່ຫ້ອງປະຊຸມ ຫ້ອງວ່າ

ການແຂວງ, ໂດຍພາຍໃຕ້ການເປັນປະທານຂອງ ສະຫາຍ ຄໍາເພັດ ພົມມະລາດ ເລຂາຄະນະພັກຮາກຖານ ຫົວໜ້າພະແນກເຕັກໂນໂລຊີ ແລະ ການສື່ສານແຂວງ, ເປັນກຽດເຂົ້າຮ່ວມຂອງ ສະຫາຍ ສໍາລານ ສຸວັນນະໂຊດ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ, ສະຫາຍ ແພງຊ້ອຍ ແພງເມືອງ ກໍາມະການພັກແຂວງ ຫົວໜ້າພະແນກໂຍທາທິການ ແລະ ຂົນສົ່ງແຂວງ, ມີຄະນະພັກຮາກຖານ, ແຂກຖືກເຊີນ, ໜ່ວຍປະຕິບັດງານຂອງແຂວງ, ເລຂາ - ຮອງເລຂາໜ່ວຍພັກ, ພ້ອມດ້ວຍສະມາຊິກພັກພາຍໃນຮາກຖານເຂົ້າຮ່ວມ.

ໃນກອງປະຊຸມ ສະຫາຍ ຄໍາເພັດ ພົມມະລາດ ເລຂາຄະນະພັກຮາກຖານພະແນກເຕັກໂນໂລຊີ ແລະ ການສື່ສານ ໄດ້ກ່າວເປີດກອງປະຊຸມ ຈາກນັ້ນ ສະຫາຍ ນິລັນດອນ ຈິດຕະກອນ ຮອງເລຂາຄະນະພັກຮາກຖານ ໄດ້ຜ່ານລາຍງານການເມືອງທັງສອງພາກ ເຊິ່ງໄດ້ຍົກໃຫ້ເຫັນດ້ານດີທີ່ເປັນຜົນງານ, ດ້ານອ່ອນ, ສາເຫດ ແລະ ບົດຮຽນທີ່ຖອດຖອນໄດ້ ໃນການຊີ້ນໍາ-ນໍາພາຂອງຄະນະພັກຕະຫຼອດໄລຍະຜ່ານມາ ພ້ອມກຳນົດທິດທາງແຜນການແຕ່ນີ້ຮອດປີ 2029 ໃຫ້ປະກົດຜົນເປັນຈິງ, ຄະນະພັກຮາກຖານ ພະແນກເຕັກໂນໂລຊີ ແລະ ການສື່ສານແຂວງ ເປັນຮາກຖານໜຶ່ງ ທີ່ຂຶ້ນກັບ ແລະ ຢູ່ພາຍໃຕ້ການນໍາພາ-ຊີ້ນໍາ ຂອງຄະນະປະຈໍາພັກແຂວງ, ເປັນເສນາທິການໂດຍກົງ ໃຫ້ແກ່ການນໍາຂອງແຂວງ ແລະ ຂອງກະຊວງເຕັກໂນໂລຊີ ແລະ ການສື່ສານ ໃນການຈັດຕັ້ງປະຕິບັດເປົ້າໝາຍສະຫັດສະວັດດ້ານການພັດທະນາ, ການປະຕິບັດແຜນນະໂຍບາຍຂົງເຂດເຕັກໂນໂລຊີ ແລະ ການສື່ສານ ໂດຍຕິດພັນກັບທິດຊີ້ນໍາສາມສ້າງໃຫ້ບັນລຸຕາມລະດັບຄາດໝາຍ, ຂອບເຂດການນໍາພາຂອງຄະນະພັກຮາກຖານປະກອບມີ 4 ໜ່ວຍພັກຄື: ໜ່ວຍພັກພະແນກເຕັກໂນໂລຊີ ແລະ ການສື່ສານ, ໜ່ວຍພັກບໍລິສັດໄປສະນີ ຈໍາກັດ, ໜ່ວຍພັກບໍລິສັດລາວໂທລະຄົມມະນາຄົມ ມະຫາຊົນ ແລະ ໜ່ວຍພັກບໍລິສັດອີທີແອວ ຈໍາກັດ, ມີສະມາຊິກທັງໝົດ 66 ສະຫາຍ, ຍິງ 28 ສະຫາຍ. ຜ່ານການແບ່ງປະເພດສະມາຊິກພັກ,ຂະແໜງການ, ອົງການ, ອົງການຈັດຕັ້ງມະຫາຊົນ ຕີລາຄາໜ່ວຍພັກຕາມ 5 ເນື້ອໃນ ໄລຍະ 5 ປີ ປະເພດຄະນະພັກຮາກຖານ, ຄະນະໜ່ວຍພັກ ໄດ້ປະເພດແຂງ 14 ສະຫາຍ, ຍິງ 2 ສະຫາຍ, ປະເພດສະມາຊິກພັກ ໄດ້ປະເພດແຂງ 51 ສະຫາຍ, ຍິງ 26 ສະຫາຍ, ປະເພດພະນັກງານ-ລັດຖະກອນໄດ້ ປະເພດດີ 35 ສະຫາຍ, ຍິງ 19 ສະຫາຍ, ປະເພດຂະແໜງການ ໄດ້ປະເພດແຂງ 4 ຂະແໜງການ, ປະເພດອົງການຈັດຕັ້ງມະຫາຊົນ ໄດ້ປະເພດແຂງທັງ 3 ອົງການ, 4 ໜ່ວຍພັກທີ່ຂຶ້ນກັບ ໄດ້ປະເພດ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ຈໍານວນ 2 ຄັ້ງ. ຈາກນັ້ນ ຄະນະຊຸດເກົ່າໄດ້ຂຶ້ນຜ່ານບົດສໍາຫຼວດການນໍາພາລວມພ້ອມທັງກ່າວລາໜ້າທີ່, ປະທານໄດ້ຜ່ານເງື່ອນໄຂຄະນະຊຸດໃໝ່ ເຊິ່ງມີຜູ້ສະໜັກ 7 ສະຫາຍ, ເລືອກເອົາ 5 ສະຫາຍ. ກອງປະຊຸມຄັ້ງປະຖົມມະລຶກໄດ້ເປັນເອກະສັນກັນເລືອກເອົາ ສະຫາຍ ຄໍາເພັດ ພົມມະລາດ ເປັນເລຂາຄະນະພັກຮາກຖານ, ສະຫາຍ ນິລັນດອນ ຈິດຕະກອນ ເປັນຮອງເລຂາ ທັງເປັນປະທານກວດກາ ພ້ອມດ້ວຍຄະນະຄົບຊຸດ, ພ້ອມນີ້ກອງປະຊຸມໄດ້ເລືອກເອົາຜູ້ແທນສົມບູນ-ສໍາຮອງເຂົ້າຮ່ວມກອງປະຊຸມໃຫຍ່ຂອງອົງຄະນະພັກແຂວງຄັ້ງທີ VIII ຊຶ່ງມີຜູ້ແທນສົມບູນ 5 ສະຫາຍ ແລະ ຜູ້ແທນສໍາຮອງ 1 ສະຫາຍ. ພ້ອມນີ້ໃນກອງປະຊຸມ ສະຫາຍ ສໍາລານ ສຸວັນນະໂຊດ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ ໄດ້ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ 4 ໜ່ວຍພັກທີ່ຂຶ້ນກັບ ຈາກນັ້ນ ຄະນະຊຸດໃໝ່, ຕາງໜ້າຂະແໜງການ ແລະ ອົງການຈັດຕັ້ງ ກໍໄດ້ພ້ອມກັນຂຶ້ນຈັບມືແຂ່ງຂັນໃນໄລຍະໃໝ່ຕື່ມອີກ.