ໃນວັນທີ 06 ທັນວາ 2024 ຜ່ານມາ ສະຫະພັນກໍາມະບານ ພະແນກເຕັກໂນໂລຊີ ແລະ ການສື່ສານແຂວງໄຊຍະບູລີ ໄດ້ເປີດກອງປະຊຸມໃຫຍ່ ຄັ້ງທີ I ຂຶ້ນ ຢູ່ຫ້ອງປະຊຸມໃຫຍ່ຂອງພະແນກ. ໂດຍການເປັນປະທານຂອງສະຫາຍ ບົວວັນ ແກ້ວສະຫວ່າງ ປະທານສະຫະພັນກໍາມະບານ, ເປັນກຽດເຂົ້າຮ່ວມກອງປະຊຸມໂດຍ ສະຫາຍ ຄໍາຜຸຍ ອິນທະບັນດິດ ກໍາມະການຄະນະບໍລິຫານງານສູນກາງສະຫະພັນກໍາມະບານລາວ ປະທານຄະນະບໍລິຫານງານສະຫະພັນກໍາມະບານແຂວງ, ສະຫາຍ ສະຫາຍ ນິລັນດອນ ຈິດຕະກອນ ຮອງເລຂາຄະນະພັກຮາກຖານ, ມີແຂກຖືກເຊີນ ແລະ ຜູ້ແທນ ເຂົ້າຮ່ວມທັງໝົດ 79 ສະຫາຍ, ຍິງ 36 ສະຫາຍ.

ກອງປະຊຸມຄັ້ງນີ້ ສະຫາຍ ບົວວັນ ແກ້ວສະຫວ່າງ ປະທານສະຫະພັນກໍາມະບານ ພະແນກເຕັກໂນໂລຊີ ແລະ ການສື່ສານແຂວງ ໄດ້ກ່າວເປີດກອງປະຊຸມ ພ້ອມທັງຜ່ານຮ່າງລາຍງານການເມືອງ. ເຊິ່ງປະຈຸບັນ ມີຄະນະບໍລິຫານງານທັງໝົດ 05 ສະຫາຍ, ມີກໍາມະບານຮາກຖານທີ່ຂື້ນກັບທັງໝົດ 04 ຮາກຖານ ແລະ ມີສະມາຊິກກໍາມະບານທັງໝົດ 102 ສະຫາຍ, ຍິງ 47 ສະຫາຍ; ຕະຫຼອດໄລຍະ 5 ປີ ຜ່ານມາ ກໍ່ໄດ້ຕັ້ງໜ້າເອົາໃຈໃສ່ໂຄສະນາສຶກສາອົບຮົມການເມືອງ- ແນວຄິດ ໃຫ້ແກ່ບັນດາສະມາຊິກກໍາມະບານ, ພະນັກງານລັດຖະກອນ, ກໍາມະກອນຜູ້ອອກແຮງງານຢ່າງເປັນປົກກະຕິ, ໄດ້ເປັນເຈົ້າການໃນການຈັດຕັ້ງຜັນຂະຫຍາຍ ຄົ້ນຄວ້າເຊື່ອມຊຶມ ບັນດາແນວທາງນະໂຍບາຍຂອງພັກ, ໄດ້ກະຕຸກຊຸກຍູ້ສະມາຊິກກໍາມະບານ ເຂົ້າຮວ່ມເຊື່ອມຊຶມ ເອກະສານມູນເຊື້ອວັນສໍາຄັນຂອງຊາດ, ຂອງພັກ, ຂອງຊາດ. ນອກຈາກນີ້, ດ້ານວຽກງານໄປສະນີມີບໍລິສັດທີ່ດໍາເນີນທຸລະກິດການບໍລິການດ້ານໄປສະນີ (ຮັບ - ຝາກ) ພັດສະດຸ ຈໍານວນ 15 ຫົວໜ່ວຍ (ບໍລິສັດ) ມີທັງໝົດ 47 ປ່ອງບໍລິການ ກວມເອົາ 11 ຕົວເມືອງໃນທົ່ວແຂວງ ເຮັດໃຫ້ປະຊາຊົນສາມາດເຂົ້າເຖິງການບໍລິການດ້ານໄປສະນີ ຢ່າງສະດວກສະບາຍ, ສາຂາບໍລິສັດທີ່ໃຫ້ການບໍລິການດ້ານໂທລະຄົມ ແລະ ອີນເຕີເນັດ, ໂຄງລ່າງພື້ນຖານໂທລະຄົມມະນາຄົມໄດ້ມີການຂະຫຍາຍສັນຍານໂທລະສັບ, ອິນເຕີເນັດ ໄປສູ່ເຂດຫ່າງໄກສອກຫຼີກ, ເຂດຊົນນະບົດ ເຮັດໃຫ້ປະຊາຊົນສາມາດເຂົ້າເຖິງ ແລະ ນໍາໃຊ້ໄດ້ສະດວກສະບາຍ ໃນການຕິດຕໍ່ສື່ສານ, ການຊື້-ການຂາຍ ແລະ ເຂົ້າເຖິງຂໍ້ມູນຂ່າວສານ ທັນກັບສະພາບການ, ຊຸກຍູ້ສົ່ງເສີມໃຫ້ບັນດາພະແນກການ, ອົງການອ້ອມຂ້າງແຂວງ ແລະ 11 ເມືອງ ພາຍໃນແຂວງ ໃຫ້ຫັນມານໍາໃຊ້ເຕັກໂນໂລຊີຂໍ້ມູນຂ່າວສານ (ໄອຊີທີ) ຫຼື ດິຈິຕອນ ຢ່າງກວ້າງຂວາງ ທີ່ຈະກາຍເປັນເຄື່ອງມືທີ່ທັນສະໄໝໃນການອຳນວຍຄວາມສະດວກຕໍ່ກັບການປະຕິບັດໜ້າທີ່ວຽກງານໃນທຸກຂະແໜງການ ຂອງພາກລັດ. ດ້ານຂະບວນການ 5 ເປັນເຈົ້າ ໄດ້ຈັດຕັ້ງປະຕິບັດໂດຍຕິດພັນກັບການປະຕິບັດວຽກງານວິຊາສະເພາະ ເຊິ່ງຜ່ານການປະເມີນຕົວຈິງເຫັນວ່າ ສະມາຊິກກໍາມະບານ ແລະ ການຈັດຕັ້ງກໍາມະບານໄດ້ຢັ້ງຢືນ 5 ເປັນເຈົ້າ ກວມອັດຕາສ່ວນສູງ, ສະມາຊິກໄດ້ຮັບຫຼຽນກາກຳມະບານ ທັງໝົດ 15 ສະຫາຍ, ຍິງ 02 ສະຫາຍ, ໃບຍ້ອງຍໍຂັ້ນສູນກາງສະຫະພັນກຳມະບານລາວ ທັງໝົດ 49 ສະຫາຍ, ຍິງ 23 ສະຫາຍ, ໃບຍ້ອງຍໍສະຫະພັນກຳມະບານແຂວງ ທັງໝົດ 38 ສະຫາຍ, ຍິງ 22 ສະຫາຍ ແລະ ໄດ້ຮັບຮອງເປັນສະຫະພັນກໍາມະບານ 5 ເປັນເຈົ້າຈາກສະຫະພັນກໍາມະບານແຂວງ.

ໃນກອງປະຊຸມຄັ້ງນີ້ ຜູ້ແທນກໍາມະບານໄດ້ພ້ອມກັນໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະບໍລິຫານງານສະຫະພັນກໍາມະບານພະແນກຊຸດໃໝ່ ບົນພື້ນຖານຄວາມຖືກຕ້ອງສອດຄ່ອງກັບມາດຖານ ເງື່ອນໄຂທີ່ກໍານົດໄວ້ ເຊິ່ງມີຜູ້ ສະໝັກເລືອກຕັ້ງທັງໝົດ 09 ສະຫາຍ, ຍິງ 02 ສະຫາຍ, ເລືອກໄດ້ 07 ສະຫາຍ, ຍິງ 01 ສະຫາຍ. ກອງປະຊຸມຄັ້ງປະຖົມມະລຶກໄດ້ເປັນເອກະສັນກັນເລືອກຕັ້ງເອົາ ສະຫາຍ ຊາຍ ລາໄພບູນ ເປັນປະທານສະຫະພັນກໍາມະບານ, ສະຫາຍ ທະນູໄຊ ບຸນເຮືອງ ເປັນຮອງປະທານ, ເປັນປະທານກວດກາ ແລະ ສະຫາຍ ຄໍາພັນ ສຸວັນນາລີ ເປັນຮອງປະທານ. ພ້ອມນັ້ນກໍ່ໄດ້ເລືອກເອົາຜູ້ແທນສົມບູນ 05 ສະຫາຍ, ຍິງ 01 ສະຫາຍ ແລະ ຜູ້ແທນສໍາຮອງ 02 ສະຫາຍ ເພື່ອເຂົ້າຮວ່ມກອງປະຊຸມໃຫຍ່ຂັ້ນເທິງຖັດຕົນ.

ໃນຕອນທ້າຍກອງປະຊຸມ ໄດ້ເປັນກຽດຮັບຟັງການໂອ້ລົມຂອງ ສະຫາຍ ຄໍາຜຸຍ ອິນທະບັນດິດ ກໍາມະການຄະນະບໍລິຫານງານສູນກາງສະຫະພັນກໍາມະບານລາວ ປະທານຄະນະບໍລິຫານງານສະຫະພັນກໍາມະບານແຂວງ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຜົນງານທີ່ ສະຫະພັນກໍາມະບານພະແນກເຕັກໂນໂລຊີ ແລະ ການສື່ສານແຂວງ ຍາດມາໄດ້ໃນຕະຫຼອດໄລຍະ 5 ປີຜ່ານມາ ແລະ ໄດ້ເນັ້ນໜັກບາງບັນຫາເປັນຕົ້ນແມ່ນ ໃຫ້ຄະນະບໍລິຫານງານກໍາມະບານເມືອງຊຸດໃໝ່ ເພີ້ມທະວີໃນການສຶກສາອົບຮົມການເມືອງ-ແນວຄິດໃຫ້ສະມາຊິກກໍາມະບານໃຫ້ທົ່ວເຖິງ, ປັບປຸງການຈັດຕັ້ງ ແລະ ແບບແຜນວິທີເຮັດວຽກ ການນໍາພາ-ຊີ້ນໍາໃຫ້ມີຄວາມເຂັ້ມແຂງ, ເປັນເຈົ້່າການປົກປ້ອງສິດຜົນປະໂຫຍດອັນຊອບທໍາຂອງສະມາຊິກກໍາມະບານ ແລະ ຜູ້ອອກແຮງງານ ແລະ ປະຕິບັດຂໍ້ແຂ່ງຂັນ 5 ເປັນເຈົ້າ ຂອງກໍາມະບານລາວ ໃຫ້ເປັນຂະບວນຟົດຟື້ນ.