ກອງປະຊຸມໃຫຍ່ສະມາຊິກສະຫະພັນແມ່ຍິງຮາກຖານພະແນກເຕັກໂນໂລຊີ ແລະ ການສື່ສານແຂວງໄຊຍະບູລີ ຄັ້ງທີ I ໄດ້ຈັດຂຶ້ນໃນຕອນເຊົ້າຂອງວັນທີ 28 ພະຈິກ 2024 ນີ້ ທີ່ຫ້ອງປະຊຸມພະແນກດັ່ງກ່າວ ພາຍໃຕ້ການເປັນປະທານຂອງສະຫາຍ ນາງ ດວງໄພວອນ ສີບຸບຜາ ປະທານສະຫະພັນແມ່ຍິງຮາກຖານ ພະແນກເຕັກໂນໂລຊີ ແລະ ການສື່ສານແຂວງ, ສະຫາຍ ນິລັນດອນ ຈິດຕະກອນ ຮອງເລຂາຄະນະພັກຮາກຖານ ພະແນກເຕັກໂນໂລຊີ ແລະ ການສື່ສານແຂວງ, ສະຫາຍ ນາງ ທອງໃສ ພູພົມມະຈິດ ຮອງປະທານສະຫະພັນແມ່ຍິງແຂວງ, ມີບັນດາແຂກທີ່ຖືກເຊີນ ພ້ອມດ້ວຍສະມາຊິກແມ່ຍິງພາຍໃນພະແນກເຂົ້າຮ່ວມ.

ສະຫາຍ ນາງ ດວງໄພວອນ ສີບຸບຜາ ປະທານສະຫະພັນແມ່ຍິງຮາກຖານ ພະແນກເຕັກໂນໂລຊີ ແລະ ການສື່ສານແຂວງ ຂຶ້ນກ່າວເປີດກອງປະຊຸມຢ່າງເປັນທາງການ ພ້ອມທັງຜ່ານບົດລາຍງານການເມືອງທັງສອງພາກ ເຊິ່ງສະຫາຍໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ ແລະ ຂໍ້ຄົງຄ້າງ ໃນໄລຍະ 5 ປີ ຜ່ານມາ ສະຫະພັນແມ່ຍິງຮາກຖານ ພະແນກເຕັກໂນໂລຊີ ແລະ ການສື່ສານແຂວງ ໄດ້ເຄື່ອນໄຫວພາຍໃຕ້ການນໍາພາຊີ້ນໍາໂດຍກົງ ມີພາລະບົດບາດໃນການສຶກສາອົບຮົມການເມືອງແນວຄິດໃຫ້ເອື້ອຍນ້ອງແມ່ຍິງພາຍໃນຮາກຖານ ປະຕິບັດແນວທາງຂອງພັກ, ລະບຽບກົດໝາຍຂອງລັດ, ຂໍ້ກໍານົດ ແລະ ມະຕິ, ຄໍາສັ່ງຂອງຂັ້ນເທິງວາງອອກຢ່າງເຂັ້ມງວດ. ສະຫະພັນແມ່ຍິງຮາກຖານ ພະແນກເຕັກໂນໂລຊີ ແລະ ການສື່ສານແຂວງ ມີສະມາຊິກທັງໝົດ 47 ສະຫາຍ, ມີຄະນະຮາກຖານ 5 ສະຫາຍ, ມີ 4 ໜ່ວຍທີ່ຂຶ້ນກັບ. ສະມາຊິກແມ່ຍິງຮາກຖານ ພະແນກເຕັກໂນໂລຊີ ແລະ ການສື່ສານແຂວງ. ໃນການປະຕິບັດວຽກງານໃນໄລຍະຜ່ານມາຊຶ່ງໄດ້ຮັບການຍ້ອງຍໍຂັ້ນລັດຖະບານ 8 ສະຫາຍ, ຂັ້ນສູນກາງປະເພດໜຶ່ງ 5 ສະຫາຍ, ໄດ້ຮັບຍ້ອງຍໍໃນການຈັດຕັ້ງຂໍ້ແຂ່ງຂັນ 3 ດີ ໃນໄລຍະ 1 ປີ ຈາກສະຫະພັນແມ່ຍິງແຂວງ 47 ສະຫາຍ. ປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວສາມາດເລືອກບຸກຄົນ 3 ດີ ຄື: ພົນລະເມືອງດີ 47 ສະຫາຍ ເທົ່າກັບ 100% , ພັດທະນາດີ 47 ສະຫາຍ ເທົ່າກັບ 100 % ,ສ້າງຄອບຄົວດີ 47 ສະຫາຍ ເທົ່າກັບ 100%, ບຸກຄົນ 3 ດີ ປະເພດໜຶ່ງ 47 ສະຫາຍ ເທົ່າກັບ 100 %, ຮາກຖານສະຫະພັນແມ່ຍິງ 3 ດີ 1 ຮາກຖານ, ໜ່ວຍສະຫະພັນແມ່ຍິງ 3 ດີ 4 ໜ່ວຍ. ຈາກນັ້ນ ຄະນະຊຸດເກົ່າຂຶ້ນຜ່ານບົດສໍາຫຼວດການນໍາພາລວມ ພ້ອມທັງກ່າວລາໜ້າທີ່, ປະທານໄດ້ຜ່ານມາດເງື່ອນຜູ້ທີ່ສະໜັກເຊິ່ງມີຜູ້ສະໜັກ 7 ສະຫາຍ ເລືອກເອົາ 5 ສະຫາຍ ກອງປະຊຸມຄັ້ງປະຖົມມະລຶກເຫັນດີເອກະສັນກັນເລືອກເອົາສະຫາຍ ນາງ ດວງໄພພອນ ສີບຸບຜາ ເປັນປະທານ, ສະຫາຍ ນາງ ກຸຫຼາບ ບົວປະເສີດ ເປັນຮອງປະທານ ທັງເປັນປະທານກວດກາ ພ້ອມດ້ວຍຄະນະຄົບຊຸດ.